Sut mae adeiladu eich achos i warchod natur rhag bygythiad datblygu

Gall fod yn anodd gwybod ble i ddechrau wrth lunio achos i atal neu newid datblygiad arfaethedig er mwyn cael y canlyniad gorau i fyd natur. Dyma rai camau ar gyfer datblygu eich achos.

Polisi cynllunio lleol a chenedlaethol yw’r fframwaith y gwneir pob penderfyniad cynllunio yn ei erbyn. Felly, mae bob amser yn werth holi beth mae’r cynllun datblygu lleol perthnasol yn ei ddweud am y safle neu’r math o ddatblygiad sy’n cael ei gynnig. Mae hefyd yn bwysig holi a yw unrhyw ganllawiau polisi cynllunio cenedlaethol perthnasol yn cynnwys polisïau ar raddfa ehangach a allai helpu i gefnogi eich safbwynt.

Mae’n bosib bod ceisiadau wedi’u gwneud ar gyfer datblygu’r safle o’r blaen, sy’n gallu bod yn ffynhonnell wybodaeth ddefnyddiol. Gallai ceisiadau blaenorol gynnwys gwybodaeth ecolegol ddefnyddiol am y safle. Os gwrthodwyd cais cynharach, gall y llythyr penderfyniad ac adroddiad y Swyddog Cynllunio hefyd roi cliwiau ynghylch sut y gallai’r cais presennol gael ei drin. Dylai manylion ceisiadau hanesyddol fod ar gael drwy’r system mynediad cyhoeddus ar wefan yr awdurdod cynllunio lleol.

Dylai fod rhagdybiaeth gref yn erbyn unrhyw ddifrod i safleoedd bywyd gwyllt gwarchodedig, gan gynnwys o ganlyniad i effeithiau anuniongyrchol (fel gormod o sŵn, golau artiffisial neu lygredd dŵr). Edrychwch ar ein canllaw Sut mae asesu pwysigrwydd safle sydd dan fygythiad oherwydd datblygu i ddarganfod sut mae chwilio am unrhyw ddynodiadau cadwraeth yn yr ardal, ac i gael rhagor o wybodaeth am y warchodaeth sydd cael ei darparu gan y gwahanol fathau o ddynodiad.

Casglwch dystiolaeth i gefnogi a chryfhau eich dadleuon allweddol. Mae llawer o dystiolaeth gyhoeddedig ar gael ar-lein a gellir dod o hyd iddi drwy ddefnyddio un o nifer o adnoddau chwilio ar-lein rhad ac am ddim, fel Google Scholar. Mae gan y rhan fwyaf o gyrff cadwraeth natur statudol y DU hefyd lyfrgelloedd ar-lein y gellir eu chwilio sy’n cynnwys adroddiadau ymchwil defnyddiol. Byddwch yn ddarbodus gyda dyfyniadau o ffynonellau tystiolaeth ond gofalwch nad ydych yn rhy ddetholgar na dyfynnu o’r tu allan i’r cyd-destun.

Gall eich tystiolaeth eich hun hefyd helpu i ddangos a chefnogi eich achos. Gall ffotograffau wedi’u dyddio a’u hanodi sy’n dangos nodweddion neu rywogaethau penodol o fewn y safle dan sylw a chofnodion wedi’u coladu o fywyd gwyllt ddarparu tystiolaeth gref i’r sawl sy’n gwneud y penderfyniad. Edrychwch ar ein canllaw Sut mae cofnodi bywyd gwyllt i gael awgrymiadau ar arolygu safle a chofnodi data bywyd gwyllt.

Dylech allu dod o hyd i unrhyw ymatebion gan aelodau eraill o’r cyhoedd ac ymgynghoreion statudol sydd eisoes wedi cael eu derbyn gan y sawl sy’n gwneud y penderfyniad ar eu system mynediad cyhoeddus ar-lein, drwy chwilio gan ddefnyddio cyfeirnod y cais neu gyfeiriad y safle. Gall adeiladu ar sylwadau pobl eraill neu ddangos sut mae eich rhai chi’n ategol eich helpu i ehangu eich negeseuon eich hun.

Gall cynnig enghreifftiau cadarnhaol o ddatblygiadau tebyg sydd wedi’u cynllunio i fod yn gydnaws â natur, neu i’r gwrthwyneb lle mae cynlluniau tebyg eraill wedi gwneud difrod amgylcheddol, fod yr un mor effeithiol wrth gyflwyno eich achos.

Gall dalu i gydnabod ymlaen llaw efallai na fydd y penderfyniad yn mynd fel y mynnwch. Ystyriwch pa newidiadau neu ‘fesurau lliniaru’ y gellid eu cyflwyno, neu pa amodau neu rwymedigaethau cynllunio y gallai’r sawl sy’n gwneud y penderfyniad eu gosod ar unrhyw ganiatâd cynllunio a allai helpu i leihau neu ddileu eich pryderon.

Os yw’r awdurdod cynllunio wedi datgan argyfwng hinsawdd a/neu fioamrywiaeth, defnyddiwch hwn i fframio eich pryderon, fel drwy bwysleisio’r angen i gyfyngu ar allyriadau carbon a lleihau colli bioamrywiaeth. Mae ein hadran Adnoddau yn cynnwys rhagor o ganllawiau sy’n egluro sut y gallwch chi annog eich awdurdod lleol i weithredu ar yr argyfwng hinsawdd, os nad ydyn nhw wedi gwneud hynny’n barod.

Sut mae asesu pwysigrwydd safle sydd dan fygythiad oherwydd datblygu

Sut mae ysgrifennu ymateb effeithiol i gais cynllunio

Sut mae cael gafael ar wybodaeth gyhoeddus i ddiogelu natur: Ceisiadau Rhyddid Gwybodaeth a Rheoliadau Gwybodaeth Amgylcheddol